Chhod do akela mujhe

Chhod do akela mujhe tum,
Na sath tumhara chaahiye,
ro lene do kaandho se lipat ke..
Na hath tumhara chaahiye..

*kaandho = diwaaro

Ras jo ghole the bolo me,
Faily thi jo baahe pyar me,
chhalki thi jo aankhe mere liye,
le lo vapis un bhaavo ko..
ki ab vo kadve ho liye..
na ab mujhe behlaiye..!!

Jo baate dil ko lubhaya karti thi..
man ko gud-gudaya karti thi..
mehkati thi kabhi jo khayaalo ko..
ankho me chamak bhar deti thi..
vahi baate tumhe dukh deti hai..
maayne badal ke tanz deti hai..
chhodo bhi ab jaane do..
rone do tanhaai ko.
Na saath tumhara chaahiye..!!

Pal-pal me kya ghatiT hua,
kahi man mujhse to nahi vyathit hua..
har lamha khushi dene ki chaahat ne..
har pal me pyar ka rang bhara..
fir bhi tum mujhse chhitak se jate ho..
uktaahat se mano bher jate ho..
ati har cheez ki hoti hai buri..
u hi kuchh keh kar tum..
mere pyar ko thukra dete ho.

Kabhi meri khushi ki khatir hi..
tumne hi aansu chhalkaaye the..
kayi baar mujhe hasaane ko..
tum sarhade paar kar aaye the..
aaj bhi vyakul ho jate ho..
jab aahe meri sunte ho..
na jane, fir kaise nishthur hote ho..
kaise yu muh faira karte ho..!!

kya hota hai, jab mujh per tum
toot ke yu barsa karte ho..
apna aapa khote ho..
behaal mujhe bhi karte ho..!!

har sukh dene ki mansha me..
khud hi dukh de jate ho..
tab pyar ko ghutan samajhte ho
aur apni jaan se rutha karte ho..!!

Kya dosh na jane hai mera..
jo yu thukrayi jaati hu..
har baar rauder roop ki
main hi kyu bhait chadhaayi jati hu.

Shayed, umeede badha leti hu main,..
ji-jaan se chaah leti hu main..
rom-rom mera rota hai..
jab yu dutkaar di jati hu main..!!

Chhod do akela mujhko tum..
ab na saath tumhara chaahiye..
rone do lipat ke mujhe kandho se..
Ab na haath tumhara chaahiye..!!