Dharti Aur Manav

Dharti maa ne janm diya hai,
dharti maa ne paala hai.
kintu haay humne dharti ka,
sarvnaash kar daala hai.

Jin vrikshon ne dharti maa ke,
gehare jakhmon ko paata.
bade beraham hokar humne,
aise vrikshon ko kaata.

Hare bhare leharaane waale,
vriksh vastra hain dharti ke.
sabki raksha karne waale,
vriksh shastra hain dharti ke.

Bin vasan ke maa beton se,
kaise aankh milayegi?
abhi sambhal ja murkh manav,
varna yah mar jaayegi.

Aadhi, toofan, baadh, bavndar,
ise nasht kar jayenge.
nasht agar dharti hogi to,
hum sab bhi mit jaayenge.