Share Aayi Garmi Aayi

Aag lagaati, badan jalaati,
aayi garmi aayi.
bhaag gaye sab ooni kapade,
kambal aur razaai.

Lapat chali jhulsaane waali,
tap tap bahe pasina.
suraj ne gir kar dharti par,
kathin kar diya jeena.

Bhule hawa chalaana thandi,
pankha COOLER saare.
lagata hai nikal jaate ab,
loo se praan humare.

Peene ka mann hota sabka,
matka bhar bhar paani.
aur nahaate hai ghanton tak,
Mohan, Abdul, Johny.

Raat raat bhar kaate machchhar,
bijali gul ho jaati.
badalein karwat idhar udhar sab,
lekin neend na aati.