Baadal

Gore baadal kaale baadal,
nabh par kitne saare baadal,
kabhi jor se garjan karte,
kabhi shaant bechaare baadal.

Garmi se tapati dharti par,
sheetal pawan chalaate baadal,
sukhe vrikchh hare ho jaate,
aisa jal barsaate baadal.

chaatak, mor, papihaa naache,
dekh door se aate baadal,
jangal mein mangal ho jaate,
jab nabh par chha jaate baadal

Saare jag ki pyaas bujhaate,
itna neer bahaate baadal,
naale, nadiyaan aur smandar,
upar tak bhar jaate baadal.

inderdhnush ke rang lutaate,
pehla paath prhaate baadal,
karo sdaa dharti ki sewa,
humko ye sikhlaate baadal.