Jaane Waale Teri Khidmat Me

jaane waale teri khidmat me
kuchh lafj hain meri mohabbat ke
ik intejaar tere lautne ka
aur harf hain kuchh meri chaahat ke

ye pal main baandh ke rakh lu jara
tumhe dekh rahi jab jaate huye
sang laayi hu kaisi ye saja
main is duniya me aate huye

mujhe raato ki ninde de ja
tere baad main shayad so na saku
kuchh ashq bhi daal de daaman me
kya pata main fir kabhi ro na saku

saawan ki kuchh boonde de jaa
jal na jaaye kahi khaali dil
mehfil ki jaan tanhaai khoje
reh jaaye kya fir raunak-e-mehfil

abhi se teri duuri bataati hain
kis kadar tum mere paas the
mere ashq ye jaise bata rahe
mere khwabo ki tum pyaas the

jaane bane kaise kab kis pal
tere sapne meri kamjoriya
thi khabar ho tum mere jitne karib
utni hi najdik bhi hongi duriyaa

ehsaas na de mere dil ko ye
kuchh baaki nahi sab khatam huya
ik umr tere sang rehne ka
choor mera ye bharam huya

kyu dil ko main samjha na saku
kuchh pal hi the teri mohabbat ke
ik intejaar tere lautne ka
aur harf hain kuchh meri chaahat ke